الإدمان اضطراب نفسي

كثير من الناس لسه بيعتقدوا إن الإدمان مجرد ضعف إرادة أو قلة عزيمة، وده مفهوم خاطئ وظالم جدًا للمريض. الإدمان في حقيقته اضطراب نفسي سلوكي معقّد، بيأثر على كيمياء المخ وطريقة التفكير واتخاذ القرار.
المدمن مش شخص “اختار” يضيع نفسه، لكنه شخص دخل في دائرة مرضية خلت المخ يربط الراحة والهروب بالمخدر أو السلوك الإدماني.

الإدمان بيغيّر مراكز المكافأة في الدماغ، ويضعف التحكم في الاندفاع، ويخلي الشخص رغم وعيه بالأضرار غير قادر على التوقف بمفرده. علشان كده اللوم والعقاب مش علاج، والضغط مش حل، والتهديد عمره ما كان طريق للتعافي.

العلاج الحقيقي يبدأ لما نفهم إن المدمن مريض محتاج دعم وعلاج نفسي وطبي، مش محاكمة. جلسات العلاج النفسي، والعلاج السلوكي، والدعم الأسري، كلها أدوات أساسية بتساعد المريض يستعيد توازنه ويتعلم يتعامل مع الألم والضغوط بدون ما يهرب للإدمان.

لما نغيّر نظرتنا للإدمان، نقدر نفتح باب أمل حقيقي للتعافي. الرحمة والفهم والعلاج الصحيح أقوى بكتير من أي لوم.
الإدمان مرض… والتعافي ممكن.

د منى اليتامي